حامد کرزی، رییس‌جمهور پیشین کشور از زندانی شدن حدود یک هزار شهروند افغانستان به شمول زنان و کودکان در ایالت سند پاکستان خبر داد و گفت که دولت پاکستان با مهاجران افغانستان باید مثل یک همسایه نیک رفتار کند.
آقای کرزی روز (دوشنبه، ۱۶ عقرب) در چند رشته توییتی، از برخورد دولت پاکستان با مهاجران افغانستان ابراز نگرانی کرده و آن را تاسف بار خوانده‌است.
رییس جمهور پیشین از دولت پاکستان خواسته که بر اساس موازین بین‌المللی و حقوق بشری، روش سالم و درخور یک همسایه نیک با مهاجران افغانستان رفتار نماید.
وی در ادامه از سازمان ملل متحد و نهادهای مدافع حقوق بشری خواست تا در قسمت تامین شرایط بهتر زندگی برای مهاجران افغانستان در پاکستان تلاش نموده و از حقوق آنها دفاع کنند.
چندی قبل دولت پاکستان اعلام کرده بود که شهروندان افغانستانی فاقد مدارک، در این کشور را اخراج می‌کند.
این در حالی است که پس از تسلط حکومت سرپرست فعلی بر افغانستان، هزاران شهروند کشور در پاکستان پناهنده شده‌اند.
